18.12.11

Nadala

Robin, Robin, resveilly-tey!
Vin vey les grandz merveille!
Noé vin suz, despachiz-tey!
Alin tiut à les veille!

Le veille saron enquanet
Deden l’esglisiz, s’é Dioz plait,
Où noz orrin l’officioz
Et chanterin à la mynet,
Noé du doulx Jesus que nayt,
Per noz estre propicioz

Robin ...

Papaz, Cardinal, Chappellan,
Moynoz, religiouz neyr et blanc
Qu’este de Dioz vicayroz,
Sey cy misteroz contemplan,
En toute vertu reluysan,
Monstra bon exemplairoz.

Robin ...

Prince, Rey, Seigneur et Gentv,
Que teny vil Ioz ply pety,
Veyde cy en l’establoz,
Que soz bins voz a departy,
Ne ly teny ci dué party,
Sey ez sioz charitabloz.

Robin ...

Puploz, devot, marchans, borgey,
Il fault qu’à Joseph voz brogey
Et qu’à luy sey semblabloz
En proudhomiaz et bonna fey,
Pidoz, devotioz et cortey,
Enfaictz et dictz valabloz.

Robin ...

Dame curiose en vanita,
Borgeyse que voz mignota,
Veyde de Dioz la mare:
Lé git ba en humilita,
Veny la vey et aveyta
Commen ey voz fault fare.

Robin ...

Gens de villagoz, gens ganyour,
Gens de tous mestierz, labourour,
Veny à cestaz festaz,
Accompaigniz-voz des patours
Et veny, humbloz comme lour,
A Dioz faire requestaz.

Robin ...

Totte gens ez estas comprey,
Quand Noé d’accord chanterey,
Dioz amerey en crentaz,
Vostroz vin en paix gauderey,
En tote chose frogerey,
Dit l’Escripturaz saintaz.

Robin ...

Ango du Ciel son adventa
Et un bel noé ont chanta,
Annoncentz pex en terraz,
A gentz de bonne vollonta.
Et fust tot adrey appointa,
Noz n’arin ply la guerraz.

Robin ...
                                             (1555) Nicolas Martin
                                                     Nadala en savoià.